1Th 1 | MED | STEP | Mon ei, na Pol, Sailas, Timoti kᵾn, moⱡpᵾn ropᵾn enim. Got Tipam ei kᵾn, Nuim Jisas Kraist raⱡ nga wamp mbᵾ met Tesalonaika Got nga rapa tenda ila mormin wamp kᵾⱡ kᵾn rop ngonmᵾn. Got nga wamp poⱡ ti uⱡ ei kᵾn, wote moⱡpa kundi uⱡ ei, enim kᵾn kan piyangga!

1 Thessalonians 1

Pol Ndi, Tesalonaika Wamp Mon Ti Kuimp Tepa Ropa Ngurum Ei

1 Mon ei, na Pol, Sailas, Timoti kᵾn, moⱡpᵾn ropᵾn enim. Got Tipam ei kᵾn, Nuim Jisas Kraist raⱡ nga wamp mbᵾ met Tesalonaika Got nga rapa tenda ila mormin wamp kᵾⱡ kᵾn rop ngonmᵾn. Got nga wamp poⱡ ti uⱡ ei kᵾn, wote moⱡpa kundi uⱡ ei, enim kᵾn kan piyangga!

Tesalonaika Wamp Kᵾⱡ Nga Mondpa Pili Orunga Ronduⱡ Puⱡnga, Molk Kai Mondrung.

2 Tᵾn rᵾk rᵾk enim wamp mbᵾ nga, Got kᵾn angge nimbun, tᵾn nga atinga rormᵾn mbila, enim nga pendᵾp mint rondurmᵾn. 3 Omba, enim nga mondpa pili ei, ronduⱡ puⱡnga, numan uⱡ kun kai mbᵾ etᵾk, Kraist numan ngormᵾn uⱡ ei ndi, kongun ronduⱡ etᵾk, Jisas Kraist yant omba, ei nga ronduⱡ mundᵾk, nokundᵾk mormin uⱡ ei, tᵾn Got Tipam ei kᵾn, kundᵾp nimin ei nga, enimp kuⱡi nakᵾrmᵾn.

4 Angmᵾn, tᵾn pᵾnmin ei, Got ndi, enim numan ngumba, elim nga wamp mendpᵾⱡ kᵾⱡ nimba mbi ropa titim. 5 Tᵾn ndi, enim Rᵾnang Ik Kai ei, nimbun ngurmᵾn ni, ik nᵾmᵾ ti mon! Ik ei nga ronduⱡ ei kᵾn, Muⱡnga Wingti kᵾn, rak ndupᵾn ik nilmina, enim nga mundmong ila mondpa pili uⱡ ei, ronduⱡ purum. Tᵾn unt enim kᵾn pep murmᵾn ei kᵾn, tᵾn nga puⱡ orunga, enim pilik mormin ei, enim nga nᵾndpᵾn itmin ni ka! 6 Enim tᵾn nga uⱡ itmin mbᵾ kᵾn, wote Nuim ei nga uⱡ etᵾm mbᵾ pep rormin. Uⱡ ei ndi ku, enim mindil mam mbᵾ nok, Muⱡnga Wingti nga numan kai pili uⱡ ei ndi, kongun ronduⱡ mundᵾk etᵾk ik ei pilik numan ngorung. 7 I etᵾng uⱡ kai mbᵾ, ya Masaroniya kᵾn, Gris kona raⱡ ila, mondpa pili wamp mormin mbᵾ, waka nduk etᵾng. 8 Wote, Got nga ik ei, enim kᵾn tepa, Masaroniya kᵾn Gris kona raⱡ ila mendpᵾⱡ pi nᵾpᵾrᵾm, mon! Enim Got kᵾn mondᵾk pᵾtmin uⱡ ei, kona mbila pora, kui ndip mel nomba puⱡnga, wamp ndi, pilik kapⱡa endᵾtᵾng. Ei kᵾn, akup tᵾn ndi, aldpa Tesalonaika mondpa pili wamp kᵾⱡ kᵾn, aldpa ik ti nimin mel mon. 9 Wamp mbᵾ ndi ku, enim Tesalonaika wamp kᵾⱡ nga ik mat nᵾtᵾng ei, tᵾn enim kᵾn ormᵾn ei kᵾn, tᵾn rawe etᵾk uⱡ kai mat etᵾng. Wote, enim nga kur atinga rormin uⱡ mbᵾ, wak rok, Got wu kupa ei nᵾk pilik, kongun kindmant endᵾtᵾng. 10 Wote, elim nga Kangᵾm wi muⱡ kona ila moⱡpa, yant omba ei nga nokundurmin ei, elim nga kangᵾm Jisas, ya wamp kuⱡi uⱡ ila, ⱡoporpa tᵾpa kont mundrum. Uⱡ ei ndi, tᵾn etpa tᵾtᵾm. Wote, Got nga popᵾⱡ akil tepa ekit omba ila, tᵾn etpa tᵾmba.